ന്യൂഡല്‍ഹി: ഡല്‍ഹി മുഖ്യമന്ത്രിയായി സത്യപ്രതിജ്ഞ ചെയ്ത് അധികാരമേറ്റെങ്കിലും അരവിന്ദ് കെജ്‌രിവാള്‍ ഇരുന്നിരുന്ന കസേരയില്‍ ഇരിക്കാന്‍ കൂട്ടാക്കാതെ അതിഷി. മുഖ്യമന്ത്രിയായിരിക്കെ കെജ്‌രിവാള്‍ ഇരുന്നിരുന്ന കസേരയ്ക്കു സമീപം മറ്റൊരു കസേരയിലാണ് അവര്‍ ഇരുന്നത്. സെപ്റ്റംബര്‍ 21-ന് സത്യപ്രതിജ്ഞ ചെയ്ത അതിഷി തിങ്കളാഴ്ചയാണ് ചുമതലയേറ്റത്.
മുഖ്യമന്ത്രിപദം രാജിവെച്ചതിലൂടെ കെജ്‌രിവാള്‍ രാഷ്ട്രീയത്തിലെ അന്തസ്സിന് മാതൃക സൃഷ്ടിച്ചുവെന്നും അതിനാലാണ് താന്‍ അദ്ദേഹത്തിന്റെ കസേരയില്‍ ഇരിക്കാത്തതെന്നും അവര്‍ പറഞ്ഞു. അതേസമയം, അതിഷിയുടെ നടപടി നാടകമാണെന്ന് പരിഹസിച്ച് ബി.ജെ.പിയും രംഗത്തെത്തി.
രാമായണത്തില്‍, ഭഗവാന്‍ രാമന്റെ പാദുകം സിംഹാസനത്തില്‍വെച്ച് അനുജനായ ഭരതന്‍ ഭരണം നടത്തിയതുപോലെ താന്‍ നാലുമാസം ഡല്‍ഹിയുടെ മുഖ്യമന്ത്രിയായി പ്രവര്‍ത്തിക്കും. രാജിവെച്ച് സ്ഥാനമൊഴിഞ്ഞതിലൂടെ അരവിന്ദ് കെജ്‌രിവാള്‍ രാഷ്ട്രീയത്തിലെ അന്തസ്സിന്‍റെ മാതൃകയായി മാറി. അദ്ദേഹത്തിന്റെ പ്രതിച്ഛായ തകര്‍ക്കാനുള്ള ഒരു അവസരവും ബി.ജെ.പി. പാഴാക്കിയിരുന്നില്ല, മുഖ്യമന്ത്രിയായി ചുമതലയേറ്റതിന് പിന്നാലെ അതിഷി പ്രതികരിച്ചു.
അതേസമയം, ഡല്‍ഹിയിലെ ഈ നാടകം അവസാനിപ്പിക്കണമെന്ന് ബി.ജെ.പിയുടെ ഐ.ടി. സെല്‍ അധ്യക്ഷന്‍ അമിത് മാളവ്യ സാമൂഹിക മാധ്യമമായ എക്‌സില്‍ കുറിച്ചു. അതിഷി അവരുടെ മുഖ്യമന്ത്രിക്കസേരയ്ക്കു സമീപം ഒരു ആളില്ലാക്കസേര ഇട്ടാണ് ഇന്ന് അധികാരമേറ്റത്. അതിന്റെ അര്‍ഥം അതിഷി ഡല്‍ഹി സര്‍ക്കാരിലെ മന്‍മോഹന്‍ സിങ്ങാണെന്നും യഥാര്‍ഥ മുഖ്യമന്ത്രി അരവിന്ദ് കെജ്‌രിവാള്‍ ആണെന്നുമാണ്, മാളവ്യ പരിഹസിച്ചു.
Content Highlights: delhi chief minister atishi sits next to empty chair of arvind kejriwal bjp says stop drama
Published: 23 Sept 2024, 02:56 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented